中環出更：施榮懷全票當選 掌廠商會
中華廠商聯合會尋日投票改選新一屆會長，一如所料，副會長施榮懷（Irons）以大熱姿態勝出，而且獲得出席投票嘅會董百分百票數通過，真係恭喜晒。一向團結嘅會董們，喺投票後拉埋大隊去中環南華大廈嘅私人會所五陵會慶祝，Irons就攞出多支私人珍藏嘅五十年陳年茅台酒同大家分甘同味，一於不醉無歸。
喜事接二連三
最近Irons喜事連連，十二月中旬，佢將獲職業訓練局頒發榮譽院士，以表揚佢對專業培訓教育嘅支持，早前又獲政府委任佢為非官守太平紳士，咁多開心事接踵而至，難怪尋日Irons會笑得咁開心。
Irons話，當選後預咗會忙過以前，好彩兩個囝囝喺外國讀書，家中只有一名讀緊小學六年級嘅囡囡，有太太睇住都算OK。
即將卸任嘅會長黃友嘉神態自若，卓妮問佢卸任感受，佢就話言之尚早，事關任期要到年底至結束。雖然即將淡出幕前，但佢嘅寶貝女兒黃詩岸就首次躋身廠商會會董。新一屆會董會仲有唔少新面孔，包括福建社團聯會主席林樹哲囝囝林潞、廠商會前會長梁欽榮囝囝梁啟洲，第二代年輕人已逐漸接班上位。