聖人話，仁者樂山，智者樂水。其實，呢個世界唔係仁者智者至識得樂山樂水，普羅大眾同樣喜歡遊山玩水，親近大自然㗎。
呢，香港地質公園上月獲聯合國教科文組織品題，升呢成為世界地質公園，即刻身價百倍，遊客聞風而至，每逢假日都人頭湧湧，簡直熱鬧過大笪地。不過咁，熱鬧歸熱鬧，對於地質公園嚟講，升呢未必係好事，反而係災難嘅開始，正所謂，人怕出名豬怕肥，公園升呢亂象生。
點樣亂法？本報記者連續兩個周日去現場睇過，發現唔少遊客大肆破壞地質公園，攀爬岩石、敲打六角岩柱、執走石頭、喺禁區踩單車等等，搞到七國咁亂，烏煙瘴氣。
咁就奇喇，乜地質公園冇人管理嘅咩？其實唔係冇人管理，地質公園已列作保護區，岩石及景貌均受《郊野公園條例》及《海岸公園條例》保護，由漁護署等部門負責執法。可惜，記者現場所見，雖然遊客肆意破壞，公園備受摧殘，但就好少見到有漁護署職員巡查或勸阻，即係話，有人管等於冇人管，吹脹！
漁護署話喎，地質公園自○九年開幕至今，已吸引逾一百五十萬人參觀，該署去年初至今年九月共接獲十二宗有關破壞地質公園嘅投訴。齋睇數字，投訴就唔算多，弊在呢個數字根本唔可以反映真實情況，其實，地質公園之所以搞成咁，漁護署可以講難辭其咎。正如執業大律師話齋，當局喺宣傳及教育遊客保護地質公園嘅措施都唔夠，遊客以為不知者不罪，唔少人犯咗法都唔知。事實證明，漁護署唔只巡查不力，管理失職，連宣傳及教育都做得唔夠，簡直豈有此理！
話時話，香港地質公園確實係難得一見嘅奇景，共由八個景區組成，各區都有獨特嘅地質風貌，其中西貢火山岩園區嘅六角岩柱群由陸地延伸至深海，覆蓋逾一百平方公里，係全球之冠添吖。你話喇，咁寶貴嘅自然資產畀人破壞到殘缺不全，面目全非，係咪罪過呀？點樣向子孫後代交代呀？
嗱，咪話功夫茶唔提醒吖，世界地質公園呢項榮譽唔係永久㗎，如果破壞情況持續，四年後覆審隨時會被除名，到時就唔係升呢，而係降級㗎喇。所以話，保護地質公園人人有責，遊客固然要識得珍惜，唔好搞破壞，而漁護署更應該做好自己份工，負起責任好好管理，同時亦要加強宣傳及教育，否則，萬一世界地質公園榮譽不保，桂冠被除，市民唔會放過你哋㗎！