港珠澳大橋上訴案告一段落，外傭居港權風波至今仍未平息，公民黨最近因為呢啲事件搞到五勞七傷。唔知係咪公民黨個名最近唔多馨香，一班公民黨區選候選人近期都盡量淡化黨嘅形象，務求減低殺傷力。不過佢哋嘅黨魁梁家傑竟然仲自我感覺良好，依然周街講外傭案單嘢，地區黨員想低調啲都唔得。
好似尋日咁，公民黨就搞咗個「企硬」集會，全部黨高層都出動，梁家傑上台發言時，更自動波提外傭案單官司，仲不停話佢哋做得好啱，根本唔使講乜道歉。除咗梁家傑，毛孟靜仲犀利，話輸議席都唔緊要，但黨格唔可以輸，講到已經豁咗出去咁，不知幾咁High。
不過一班地區黨友就未必係咁睇，好幾位要選嘅黨友已經盡量喺海報同街板上「去公民黨化」，個Logo有咁細得咁細，例如喺張相上候選人件衫度出現咗就算，反而自己個名同做過乜嘢，就放大啲。佢哋唔認要「去公民黨化」，但就承認係選舉策略，都幾老實吖。