政情：任亮憲無望舌戰嫻姐？
今年區議會氣氛硬係差少少，有指係同好多個選舉論壇都搞唔成有關，以黃大仙龍上選區為例，工聯會「票后」陳婉嫻重出江湖，自然成為傳媒焦點啦；同佢同區嘅對手人民力量「維園阿哥」任亮憲近日不斷要求同嫻姐公開辯論，尋日仲搞搞新意思，去到黃大仙求籤，點知黃大仙嘅答案，係一支下下籤，即係舉行論壇無望。
任亮憲話，如果真係搞唔成，相信選民亦會好失望，如果嫻姐答應，即使唔傾政治議題佢都無任歡迎o架，最緊要係嫻姐肯出席，其他乜都冇所謂。除佢哋兩個外，喺龍上選區出選嘅仲有民主黨林偉基。
除龍上區，荃灣愉景區亦有選舉論壇爭議；有電視台前日安排論壇錄影，但其中一名候選人王銳德突然稱病，結果甩底。事後有人發現，王銳德尋日繼續落區派傳單，質疑佢係唔係故意避戰；王銳德笑言，有需要可提供醫生紙，況且嚟緊仲有兩場電子傳媒辯論，到時辯到夠都仲得。愉景選區另一候選人係田北辰。