政情：議員怨自閉想拆椅重整

舊立會大樓嘅會議廳過往被批評太細太逼，議員同議員之間只有極少空間，想伸個懶腰都有困難。新大樓會議廳面積大咗幾倍，每名議員嘅座位連枱闊度有成五、六呎，成個人打橫瞓上枱都得，枱面更設有獨立電子顯示屏等各種先進設施，原意係等班議員開會開得舒服啲，同可以一邊開會一邊做其他嘢，自成一國，好似諗得非常周到，不過就搞到議員完全自閉。

經過一次施政報告發布會、一次特首答問大會同一次普通大會嘅實戰經驗之後，好多議員都抱怨新會議廳設計「大而無當」，其中最不滿係議員座位相隔太遠，好難即場交流意見同互通投票立場。例如答問大會當日，部分泛民主派議員不滿主席裁決醞釀集體離席抗議，就因為無法即時通知分開咗幾排坐嘅盟友，最後變咗個別分批離場，冇晒氣勢。

貼近主席防趕錯人離場

今次集體離席甩轆事小，將來搞到有人投錯票，意外否決咗某啲重要法案就事大。據聞有議員就曾密謀建議行政管理委員會，將全部座位甚至工作枱拆晒起過，等大家可以坐埋啲，並喺依家主席位前嘅大片綠地氈空地加建多一排座位，將全部議員齊齊向前移，等主席唔會再因為聽唔清楚議員講嘢而趕錯人離場。咁做仲可以擴大會議廳嘅最高容量，將來加到有二百個議員都夠位坐。

不過咁樣改建法，拆完又起仲要鋪過晒啲電線，隨時要過百萬元開支，肯定會畀市民鬧爆浪費公帑兼唔環保。有議員就提過一啲折衷方案，例如整番套印有「贊成」、「反對」、「棄權」同「離席」等字眼嘅展示牌，派畀全體議員或各黨派嘅黨鞭，以便佢哋透過舉牌通知黨友一致行動，認真搞笑。