中環出更：政務司司長官邸變鬼屋
位於白加道十五號嘅政務司司長官邸，周五晚突然間長滿蠄蟧絲網，陰氣陣陣，鬼影幢幢……原來保良局借地方搞咗個慈善萬聖節派對，等大家應吓節之餘，仲可以籌募善款，又可以聯絡感情，可謂一舉三得。
白加道十五號（Victoria House，簡稱VH）係政務司司長官邸，不過近年開始，團體如要舉行慈善活動，都可以借用。上星期五晚，保良局主席龐盧淑燕同先生龐國本、副主席鄭錦鐘、莎莎老闆郭少明同太太郭羅桂珍、女童軍總會總監彭徐美雲與先生彭曉明、教育局局長孫明揚夫婦等喺黃昏相繼到達，每當有嘉賓進入大門，裏面就傳來鬼聲鬼氣，大嗌「Happy Halloween」，即係萬聖節快樂。透過官邸嘅玻璃，仲可以見到裏面有演員扮鬼扮馬（圓圖），搞搞氣氛。
保良開P籌逾三百萬
VH喺山頂享有無敵海景，秋天夜晚喺度開Party，夜涼如水，不知幾寫意。唐英年已經辭去政務司司長，佢喺本月卅日之前就要搬出官邸，即係VH現時正係交吉期。不過龐太就同卓妮講，當晚係林瑞麟借畀保良局做善事嘅，不過林局長就冇嚟到。佢話，保良局之前都借過呢度搞活動，不過開萬聖節派對就係第一次，因為想搞搞新意思。當晚派對大家都玩得好盡興，扮吓嘢，食吓自助餐咁，玩到十點幾，都籌到三百幾萬架。
卓妮