我哋尋日講過立法會新大樓嘅指示牌，將「母乳餵哺室」寫成「母乳喂哺室」，事後立法會秘書處火速更正。當報道出街後，有位熱心嘅中文科老師向我哋反映，其實「餵」字同「喂」字屬共同字，可以互通使用。我哋於是請教嶺南大學中文系助理教授陳雲，佢就有唔同嘅睇法。
陳雲話，其實呢兩個字同屬近代字，「喂」字有兩種意思，一種係平時口語同人打招呼嗰個「喂」，另一種就係「喂哺」嘅意思，所以無可否認「餵」同「喂」嘅意思係相通嘅。
不過，正正因為兩個字都唔係古字，為咗搞清兩個字用法，所以「餵」字一般用於「餵飼」、「餵哺」等方面，而立法會將「喂」字更正為「餵」字都係啱嘅。
其實我哋上去特區政府網頁搵過，當局喺繁體版網頁都係用「母乳餵哺」，只係簡體版網頁會用「母乳喂哺」。為咗統一起見，立法會主動更正都係無可厚非嘅。