科技日新月異，隨住電腦普及化，港人丟棄舊電腦嘅數字不斷上升，點樣處理呢啲舊電腦最好？國泰航空同香港明愛電腦工場日前就合辦咗個「再生電腦贈學童活動」，由明愛將國泰四千六百部舊電腦循環再造，另外國泰捐出港幣三十萬元為舊電腦更新軟硬件，製成再生電腦送畀三百個喺油尖旺區居住嘅學童，國泰義工隊成員仲教授學童基本電腦知識。
每部再生電腦都包含十五吋液晶體顯示器，仲安裝埋日常基本所需嘅電腦軟件，非常周到。
國泰航空企業事務董事莊偉茵話，呢個活動達到三贏目標，國泰支持環保之餘，香港明愛亦為電腦工場嘅青少年提供電腦培訓同就業培訓，而且有需要嘅學童更可以獲贈再生電腦，可以接受更好嘅教育，有助社會改善貧富懸殊，更達至數碼共融。