政情：袁彌明斥婚外情唔OK
合和集團主席胡應湘（哥頓）日前將婚外情比喻為「課外活動」，又話「人不風流枉少年」，唔少人都做過錯事，最重要係肯認錯，浪子回頭，以及得到太太嘅原諒，講到咁，似係間接表態接受婚外情。一向敢作敢言嘅選民力量成員、前港姐袁彌明（Erica）尋日出席一個活動時，就怒斥哥頓咁樣講「唔OK！」
Erica睇唔過眼話，其實好多男人都好專一，唔係個個男人都會出軌嘅，佢覺得做男人應該要有承擔，而婚姻本身就係一個要負責任嘅行為，所以佢覺得哥頓咁講法，係好唔尊重婚姻，亦都好唔尊重女性喎。Erica仲為女性伸冤話：「有得揀，都唔會揀個結咗婚嘅男人啦！」
我哋之前講過，有傳話Erica因為要籌備結婚而放棄參選下月區議會選舉，相信對於一個就嚟結婚嘅人，聽到婚外情就更加敏感。唔知Erica上述嗰番叫男人要有承擔嘅說話，係咪想一併提醒埋佢嘅未婚夫呢？