加價加價又加價！呢一隻通脹猛虎，果然係張牙舞爪！
今次輪到乜傢伙加價呀？之唔係東江水囉。粵港雙方簽訂新一份東江水供港協議，由於營運成本上漲以及人民幣升值，東江水將會加價，未來三年按年增加百分之五點八。
發展局話呀，建議二○一二至一四年購買最多八億二千萬立方米東江水，明年費用大約三十五億元，一四年增加至接近四十億元。
根據政府嘅想法，為咗保持可靠同穩定嘅食水供應，會繼續以「統包總額」方式向廣東省購買東江水。按量購買不可行，原因係香港無法提供每年需求量。
既然東江水愈來愈貴，政府會唔會轉嫁畀小市民㗎？雖然水務署強調暫時未有計劃加水費，之不過咁，今年唔加價不代表明年唔加價，明年唔加價不等於後年唔加價。計功夫茶話齋，加水費嘅壓力一定存在，小市民到時又肉隨砧板上。
唉，水費勢必加價已經係苦惱問題，更令人惆悵嘅係香港有一個超級敗家仔，浪費食水無日無之。如果你仲要問邊一個咁冇陰功大量浪費食水，你一定冇留意無處不在嘅爆水管事件。係呀，爆水管呀，東邊爆完西邊爆，前街爆完後巷爆，初來埗到嘅外國遊客話唔定會以為「街頭噴泉」係香港刻意安排嘅獨特節目，只差在唔似得放煙花有背景音樂咋。
即係咁，水務署嘅服務質素一向水皮，每年有兩成珍貴食水白白流失。爆水管嘅原因當然同水管老化有關，可惜吖，水務署更換水管慢過蝸牛。
仲有一家嘢非常之咁唔環保，香港仍然有好多地方用食水沖廁而唔係鹹水。可能曾蔭權都覺得折墮啩，所以今年施政報告提出，上水、粉嶺同新界東北發展區引入再造水沖廁，並且作為其他非飲用用途，例如灌溉。水務署就話嘞，利用「逆滲透」技術淨化污水，每立方米成本約九元，雖然貴過東江水，但每年可節省二千一百萬立方米食水，相當於全港百分之二點二耗水量。
施政報告又提到，將會就興建一所中型海水化淡廠進行詳細研究同實地勘察，並已於將軍澳預留土地，最快六至七年後落成。
污水再造同海水化淡理論上可以開源節流，問題係，曾蔭權辦事作風一向吹完就算，乜鬼嘢十大基建，乜鬼嘢六大產業，等到夠鐘收工都未見影。
呢嗱，東江水加價顯得食水尤其珍貴，功夫茶只有一句忠告，水務署快快更換殘舊水管，水皮官僚唔好再敗家！