政情：徐立之登加國醫學殿堂
香港大學校長徐立之嘅政治觸覺未必咁好，不過佢喺醫學上嘅成就就無庸置疑。加拿大醫學殿堂榜尋日公布二○一二年獲獎學者成員名單，以表揚佢哋對人類醫學研究及醫療發展嘅建樹，徐立之都榜上有名，徐校長仲被譽為「醫健英雄」，認真威風﹗
呢個殿堂榜喺一九九四年設立，至今有八十八個傑出人士榜上有名，主辦單位話，徐校長成功搵到導致囊狀纖維症嘅缺陷基因，為五十年來嘅人類遺傳學發展帶來重要突破，主辦單位仲讚揚徐校長係人類遺傳學基因學發展嘅一個領袖人物。徐校長就話，佢好榮幸可以同加拿大醫學史上德高望重嘅人同列榜上﹗
喺中大畢業嘅徐立之，係加拿大分子遺傳學家，喺學術方面好有成就，早前國務院副總理李克強訪港時訪問港大，發生咗封校事件，成為佢校長成績表上一大污點，仲話會影響佢連任做校長添，今次得到表揚，唔知會唔會加分呢？