政情：方文雄打造長者安樂窩
香港人口老化問題殺到埋身，但係政府至今都未有完整嘅應對政策，群策學社主席方文雄（David）睇唔過眼，尋日公布一個名為「栢松坊」城市規劃構思，希望敲醒高官們嘅腦袋。社區以毗連天水圍嘅洪水橋為發展模型，區內設施專為長者度身訂造，環境優美，David話，如果個計劃可以成真，佢將來老咗都想入住添！
呢份城市規劃係由香港大學城市規劃及設計系十三位學生，以新思維規劃嘅老少共融社區。設計最大創新之處係跨代房屋概念，即係以兩個相連單位安置跨代家庭，令到長者同家人既可同住，又有獨立自主嘅空間。此外，社區內有老人醫院，又有借鏡日本嘅骨灰龕公園，設計概念確係幾超前。
David話，香港現時有九十萬名六十五歲以上長者，但係現有嘅安老院舍唔止宿位不足，質素亦未必符合有能力長者嘅需求，佢希望藉此引起政府及私人發展商關注，「栢松坊」計劃亦將提交畀政府有關部門參考。