香港人知道，下屆邊個做特首，要問「阿爺」，坊間就算有甲乙丙丁有心參選，大家都係不停打聽阿爺究竟畀邊個做，但港澳辦主任王光亞唔係咁講喎。
王光亞尋日喺北京會見炮製「史上最廢」預算案嘅財政司司長鬍鬚曾，被記者問及下屆特首人選意見時，王光亞突然爆咗一句「人選在你們手裏，不在我手裏」，明眼人一睇就知佢想洗脫阿爺欽點下屆特首嘅形象，營造港人有得揀嘅感覺。其實只要對政治有些少認識嘅市民，都會知道王光亞有關言論嘅可信程度根本就係接近零。
如果特首人選真係喺市民手裏，咁就算市民支持有「李漢奸」稱號嘅民主黨李柱銘做特首，阿爺都應該接受，但咁嘅事又點會發生呢？所以王光亞呢番說話，市民都心裏有數喇。