政情：勞福局長懶理勞福
工聯會理事長吳秋北外表斯斯文文，一副文弱書生咁嘅樣，不過原來批評起高官上嚟一啲都唔比其他工聯會立法會議員輸蝕，身為勞工顧問委員會僱員代表嘅佢尋日話，同眾多高官交手嘅經驗當中，以負責勞工政策嘅勞工及福利局局長張建宗最為滑頭，每當一啲勞工界代表希望向佢爭取改善勞工及低下層福利時，張局長都總會大耍太極，總之就大講似是而非嘅理論，講到尾其實又係「拖字訣」。
眾多局長之中，張建宗都算EQ較高，即使上次差啲畀社民連梁國雄用膠樽掟中，佢仍然面帶笑容。對於佢嘅為人，同佢交手多次嘅吳秋北就一早睇穿：「局長好識『兜圈』囉，次次都兜到唔知去咗邊，結果勞工同基層福利議題就一拖再拖。」
究竟張建宗點樣兜圈呢？就以工聯會一直爭取嘅劃一勞工假同公眾假呢個要求為例，張建宗每次都會話牽涉《勞工法例》同埋《公眾假期條例》兩條唔同法例，所以唔係咁容易處理到，要做大量研究同諮詢工作喎。
工聯遊行反外傭居權
一眼就睇出張建宗乜嘢葫蘆賣乜嘢藥，吳秋北出任理事長兩年似乎都進步唔小。佢尋日透露，工聯會屬下幾個工會嚟緊星期日會發起遊行，反對外傭得到居港權。吳秋北話，屬下唔少服務業嘅工會對呢件事反應極大，好擔心影響基層工友嘅生計，所以佢哋立場係支持政府上訴，若果完成所有法律程序都解決唔到件事，政府迫不得已都要考慮提請人大釋法。
除咗基層工友擔心外，吳秋北話自己所屬嘅文職及專業人員協會班中產會員一樣好憂慮，嚟緊星期日遊行相信至少有一千人會響應參加，希望政府了解到乜嘢係民意。工聯會今次主打外傭議題，唔知對區議會選情會唔會有幫助呢？吳秋北就笑言關係唔大，反而對手職工盟因為支持外傭有權申請居港，相信有可能流失一啲基層票喎。
咦，職工盟秘書長李卓人區議會選舉會去元朗富恩區挑戰工聯會劉桂容喎，唔知戰果會否畀吳秋北批中呢？講開區議會，大家都好關心工聯會會唔會參加選舉論壇，吳秋北就話，唔可以一概而論，佢哋從來冇講過一定唔玩，不過真係要睇吓有乜要辯囉，如果好多議題大家都有共識，咁就辯都無謂喎。