中環出更：楊姐愛琉璃自主無常
七十年代台灣紅演員楊惠姍息影後從事琉璃藝術，佢尋日喺香港，為佢嘅香港處女琉璃展覽舉行開幕儀式。人稱楊姐嘅楊惠姍話，琉璃藝術創作最吸引佢嘅地方，就係液態琉璃嘅「自主性」﹕「就好似人生咁，唔係咩都控制到，所以其實唔使咁緊張！」佢又話，整一件玻璃藝術品動輒要一年半載，所以真係唔止玻璃咁簡單！
楊姐尋日甜到漏咁用「我的愛人」介紹丈夫出場，自從同丈夫張毅夫妻檔創立咗琉璃工房後，楊姐就全情投入創作，佢話琉璃藝術最吸引佢嘅地方，就係液態琉璃有佢嘅「自主性」，好難控制，就好似人生咁，不過佢又話，無常唔代表要消極放棄，「反而應該要熱情咁擁抱人生！」
創作兩米高千手觀音
楊姐嘅作品仲去過美國同法國藝術館展出，今次首次喺香港展出，楊姐都話好緊張同興奮，不過聽楊姐話，佢依家就做緊一個兩米高嘅千手觀音，希望出年廿五周年可以順利展出啦！