中環出更：上班時間歎雪糕 李民橋「金翅得閒鳥」
早兩日下晝四點幾，卓妮撞到東亞銀行副行政總裁李民橋同同事去買雪糕食，只見佢將雪糕球一啖食落口，不知幾滋味，仲流露出一絲童真。估唔到呢位銀行極高層兼太子爺，日常生活咁樂得清閒，係一隻「金翅得閒鳥！」
同李國寶唔願走有關？
李民橋生活咁悠閒，唔知係咪同佢老竇李國寶唔願走有關呢？佢老竇身兼東亞銀行主席、行政總裁同立法會議員，立法會個位由一九八五年到依家，都唔知想做到幾時，最近佢又同銀行達成協議，延長擔任東亞行政總裁服務合約任期三年，即係做到佢七十六歲，相信將係本港銀行歷來最老嘅執行行政總裁。至於東亞主席之位，不存在合約限制，就更加唔知做到何年何日。
東亞喺○九年進行高層大換血，管理層多咗李民橋同佢細佬李民斌兩個新面孔，民橋貴為銀行副行政總裁，準備上位，年薪過千萬，仲以為佢一定係日理萬機喇。不過見到李民橋嗰日喺置地間超市買雪糕食，就知道事實可能唔係咁，實際係好悠閒。
其實喺一個月前，亦係喺正常嘅上班時間，卓妮都撞到佢去歷山大廈名店COVA買雪糕食。既然佢老竇唔願走，佢大可以周街試勻唔同品牌唔同口味嘅雪糕，睇怕可以試多幾年都得添。
卓妮