如果你話中國人道德淪喪，相信冇乜邊個會反對，否則廣東佛山車禍都唔會有不顧而去嘅冷血司機，以及見死不救嘅十八途人。如果你話中國人禽獸不如，可能有人初頭會覺得不堪入耳，之但係諗諗下又會點頭認同。
呢嗱嗱嗱，真係禽獸不如o架，東莞中堂鎮又有無良奸商製售黑心食品，食唔死人真係要劏雞還神。今次被揭發嘅黑心食品係臘肉臘腸，原材料係死豬病豬，添加劑係亞硝酸鈉，仲有農藥敵百蟲，作用顧名思義就係殺蟲。你知啦，死豬病豬真係好容易生蟲o架，物先腐然後蟲生吖嘛，所以就要用到農藥，冇理由臘肉臘腸變咗臘蟲啫。
睇怕唔使功夫茶多費唇舌解釋農藥嘅害處，只須講講亞硝酸鈉。無良奸商所用嘅亞硝酸鈉會破壞身體嘅血紅素，破壞血液輸送氧氣功能，食用者口唇同指尖會變藍，即係俗稱嘅「藍血病」。如果亞硝酸鈉保存得太耐，更加會化作致癌嘅有機氮氣，食落肚梗係增加患癌風險啦！
內地傳媒經過明查暗訪，目睹中堂鎮一個大型黑心工場，每日有幾千斤化腐朽為美食嘅臘肉臘腸，運去大嶺山信立農批市場，再流向東莞同珠三角其他城市嘅工廠食堂以及餐館。多得記者舉報，中堂鎮同大嶺山多個執法部門積極行動，終於一舉搗破呢一個害人不淺嘅蛇鼠一窩。
唉，講真，有時確係冇乜勇氣自認係中國人，鬼叫同胞一個二個咁下流賤格咩。一直以來黑心食品被揭發嘅名單水蛇春咁長，連滷味都有毒，真係難怪街坊街里問候佢滷味。今次咯喎，不妨問候佢臘味。
點解中國人嘅質素咁低嘅呢？老套都要講一句，上樑不正下樑歪，中國官場實在太腐敗嘞，腐敗到是非顛倒、黑白不分、善惡錯置，卒之導致民心生蟲，用幾多農藥敵百蟲都冇用！
係o架，做善事冇好報o架，做壞事反而有運行，你愛國咩？對唔住，國家唔愛你，而且打壓你。既然道德價值觀扭曲成咁，一個二個咪走去做奸商囉。
點都好啦，麻煩香港嘅食物衞生官僚醒醒定定，千祈唔好畀機會奸商播毒。佢臘味要防範，佢滷味要防範，所有千奇百怪嘅黑心食品都要金睛火眼好好防範。尤其係食衞局局長周一嶽，唔好諗住快夠鐘同曾蔭權一齊拍拍屁股收工，所以掉以輕心繑埋雙手，萬一有人毒死，睇怕做鬼都唔放過你。你知啦，骨灰龕位搞來搞去都話缺貨，既然死咗都冇得安息，做鬼百無聊賴，少不免搵個冤家報夢傾下閒偈o架！