這世界，許多事不關己，大可以高高掛起。之不過，有啲嘢，就身在江湖，心不由己，一旦埋身，痛在你心。
老朽所講，特區二把手林公公怕且最有同感。他最近頻頻護主，叫人支持施政報告，又去信立法會主席曾鈺成，話佢驅趕兩位「暴力」議員出議事堂做得好，仲上電台話議事規則要遵守，講到自己遇到無禮對待，佢會用「幽默」同埋「矜持」去化解。
真係失敬兼失禮！老朽一向話林公公係一部人肉錄音機，原來佢咁有品味，又幽默又矜持，活着，點都叻過隻白老鼠。未試過畀人侮辱，又點體會到人生嘅矜持？呢一部錄音機，點囂都做唔成「爛仔」啦！
古語有云：「不言，誰知其志？言之無文，行而不遠。」《論語‧雍也》則說：「質勝文則野，文勝質則史。文質彬彬，然後君子。」林公公若護主心切，就要提醒一把手唔好再出口傷人，亂咁話人哋嘅質詢係「爛仔」同「黑社會」，是非顛倒，咁樣做唔係叫「幽默」，而係叫「傻仔」！
事實是，想護主做奴才都唔係咁易。歷史記載，高士奇為了討好康熙皇帝，爭得信任，特別注意籠絡那些宮廷內侍，經常向他們詳細詢問：皇帝近日在讀哪些書？關注一些甚麼事情？然後回去預先做好準備，以備答問，可見做奴才還得有些本事。當然，林公公嘅主子不是好學、日理萬機嘅康熙，佢只愛吹水，搞到林公公想護主也如老鼠拉龜——無從下手。林公公呢份工，苦差也！