政情：龐太學太公保赤安良
百物騰貴，貧苦大眾要攞幾千元按金租房，都唔係咁容易。保良局主席龐盧淑燕就同局內高層絞盡腦汁，構思推出租金援助計劃，幫助低收入家庭租屋住，有個安身之所。龐太話，香港看似富庶，但窮人生活仍捉襟見肘，貧苦大眾一旦被逼遷或搬家，手頭隨時連幾千元按金都畀唔起，保良局將撥錢資助有需要人士租屋住，以解燃眉之急，稍後會公布申請細節。
龐太上任只有半年，已推出多項新猷，上月首推中醫服務，為長者贈醫施藥，更考慮將服務拓展至牙科，依家斟緊善心牙醫合作。龐太瞓身為保良，原來有淵源，話說佢太公盧頌舉早喺二十年代已擔任保良主席。龐太憶述，當年拐帶小童猖獗，保良主席只要手執令牌，即可以入屋救人。依家保良銅鑼灣總壇內，仲掛住太公幅相，佢一直以太公做榜樣，估唔到八十年後夢想成真，相信佢太公在天之靈，一定好安慰。