政情：行政會議合成照穿崩
醜唔係罪，但唔知醜就係罪。行政會議移師去添馬艦新特首辦之後，煲呔曾連埋成班行會非官守成員影咗張全體相，本來就咁睇呢張相並無咩特別問題，不過細心一看，唔難發現呢張相係由多張相合成為一張。唉，雖然張相未至於係造假，但起碼算得上係弄虛，堂堂特區政府搞成咁，成何體統？
只要將行會合照放大一睇，就發現多處位置出現唔脗合嘅地方，例如教育局局長孫明揚前面枱面、發展局局長林鄭月娥後面牆上嘅花紋同埋行會成員張炳良前面張枱嘅木紋，全部都出現「裂痕」。由此可以推斷，呢張相根本就係一張電腦合成照﹗
今次政府直認不諱，仲解釋因為用廣角鏡頭影呢張相，會導致相片四角會出現變形，加上佢哋又無全景相機，所以為咗有呢張咁多人嘅相，惟有用幾張相拼湊出嚟。如果佢一早老老實實，講清楚張相係一張合成照，咁就完全無事喇。