政情:特首G4立會圖書館踩線

日前我哋獨家報道過,煲呔曾喺立法會新大樓外發生被示威者「拍膊頭」事件後,特首辦主任梁卓偉帶埋同僚,喺上周四答問大會之前親自去新大樓踩線視察示威區,惹來干預立法會保安安排之嫌。雖然特首辦例牌否認,但尋日我哋就喺新大樓圖書館,撞到負責保護煲呔曾嘅G4喺度視察,有相為證。

尋日下午三點鐘左右,新大樓圖書館入面有幾個黑影喺度掩掩揚揚,睇真啲原來係立法會保安主任、保護煲呔曾嘅G4人員及新聞處人員等,不斷喺度望嚟望去,擺明係視察環境,立法會保安主任同G4有傾有講,佢哋望咗幾分鐘之後就離開咗。當中究竟有冇施壓、干預就不得而知喇。

特首辦回覆我哋查詢時話,每次煲呔曾要去活動,特首辦人員都會先去場地了解活動安排及細節,強調呢個係慣常做法,由於星期五(廿一日)煲呔曾出席立法會午宴,所以咪去新大樓了解吓安排囉。午宴地點係宴會廳,而煲呔曾同議員合照嘅地點係大堂,但尋日佢哋視察嘅係圖書館,莫非煲呔曾想改去圖書館開餐?

Money18免費即秒股票報價網站現推出8升級功能,財經資訊,實時實發!