中環出更︰「新中環」帶挈富豪身家暴漲
默默耕耘嘅廠佬最近開心到震，事關施政報告提及發展東九龍成為「新中環」，突然令區內工業大廈大翻身，好多放售嘅工廈封盤唔賣。好似前博愛醫院主席黃帆風就直認，原本打算放盤嘅旗下觀塘濱海集團中心，即刻改為放租。「工廈大王」楊耀松長子楊國佳（Alex）、「牛仔褲大王」楊釗等喺東九龍擁有唔少工廈嘅富豪，都直認係受惠者。不過，大家對政府講多過做嘅前科怕怕，話政策要落實至算，否則都係紙上富貴！
Alex家族嘅工廈物業遍布全港各主要工業區，包括觀塘、九龍灣、土瓜灣等，單單以爸爸楊耀松命名嘅工廈都數到手軟。佢話，新政策若落實，將帶旺土瓜灣、新蒲崗一帶。政府打算喺區內興建單軌列車，一向冇鐵路網絡嘅土瓜灣等地，自然比有港鐵嘅觀塘等地更加得益。
工廈升值 封盤唔賣
楊釗嘅旭日集團喺觀塘都有唔少工廈，尋日佢現身公開活動，卓妮問佢有冇受惠，佢笑容燦爛話：「梗係有啦！」咁旗下有幾多棟工廈先？十隻手指夠唔夠數？佢話要計一計喎。不過，點樣處置啲工廈，始終睇吓政府點發展。
至於黃帆風更幸運，事關佢旗下工廈剛獲批活化為寫字樓，原本已喺地產公司放盤或放租，但聽聞「新中環」政策後，即時叫停放售。八年前佢以九百幾萬元買入，活化後嘅市值可達二億五千萬元，升幅高達廿五倍。不過咁仲未夠，構思中嘅單軌列車其中有一站喺佢座大廈門口，增值潛力無限，難怪佢唔賣喇！
卓妮