嘩嘩嘩，又有變態色魔通街向小妹妹撞胸！
喂喂喂，又有秘密警察刻意對小市民隱瞞！
變態色魔大家容易理解，乜嘢叫做秘密警察呢？即係咁，觀塘翠屏邨近日連續有四名女學生慘遭批肘撞胸非禮，警方雖然通緝一名年約六十歲嘅禿頭男子，不過冇對外公布相關消息，要經過四日之後事件先至曝光。你話嘞，行事作風竟然係咁秘而不宣，唔係秘密警察又係乜呢？
秘密警察嘅「潛行凶間」唔係第一次㗎喇，十月二日將軍澳陷入「月黑風高插人夜」，口罩刺客分別喺四個地方出刀捅人，失驚無神有四個無仇無怨嘅路人遇害。對於一單咁得人驚嘅血案，死得佢吖，警方居然粒聲唔出，事後冇向傳媒報料發放消息，累到將軍澳街坊懵然不知身邊有個危險人物正在虎視眈眈。
好似今次再有撞胸色魔咁吖，觀塘區所有人心惶惶嘅姊姊妹妹都怒插警方，認為案發之後第四日先至公布案情係罔顧佢哋嘅人身安全，擔心自己淪為非禮目標都冇防範意識。
計功夫茶話齋，插得好！
你知啦，政府箝制新聞自由係不可饒恕嘅一件事，此舉等同剝削市民知情權。知情權一旦被剝削，咁就大劑嘞，香港警察隨時真係變成中國公安，特區政府話唔定確係會出現專制政權，事關黑箱作業係不受監察嘅。
講到箝制新聞自由，不得不提警方以改善通訊系統為名，實際上截斷傳媒得知案情嘅渠道。記者以往追蹤警方通訊而趕赴現場，通訊系統數碼化等於強制記者「熄機」。
除咗警方之外，消防處又話改善通訊系統喎，實際作用同樣係截斷傳媒知情渠道。
講到新聞自由被箝制，功夫茶簡直火滾。立法會上星期四答問大會，保安人員接二連三粗暴阻撓記者採訪，表現仲惡過港產公安，箝制新聞自由嘅幕後黑手居然係曾蔭權。根據可靠消息透露，曾蔭權因為不滿喺立法會遇到示威者「搭膊頭」，於是透過特首辦向立法會施壓要求加強保安。新任特首辦主任梁卓偉同政府新聞處處長黃偉綸，更加親自去到立法會新大樓對保安人員指指點點。
呢嗱嗱嗱，講到呢度必須提醒大家，香港奉行三權分立，行政機關理論上冇權過問立法機關。曾蔭權派人干預立法會，完全係踩過界嘅離譜行為！
所以難怪香港變成示威之都㗎，鬼叫曾氏政權愈來愈似神枱貓屎咩。如果被警隊禿鷹一哥視作「黑影」嘅記者下次再上街遊行，功夫茶義務提供兩句口號：踢走秘密警察，還我新聞自由！