政情：發福王敏剛 落海有交代
停辦三十三年嘅維港渡海泳尋日復辦。港區人大代表王敏剛（Peter）搵埋中銀國際副執行總裁謝湧海組隊游番轉。身形豐滿嘅Peter以一小時游畢全程，算有交代。佢自爆當年係渡海泳常客，可惜事隔三十年，肥咗五十磅。
尋日嘅賽道係由鯉魚門三家村公眾碼頭，游去鰂魚涌公園，全長一點八公里。Peter上水後氣都唔喘，Fit爆。佢話，中途風浪大，差啲搵唔到轉折站浮標。佢隊友謝先生都係老將，九歲開始游水，今年六十歲嘞。謝生牙擦話，賽前只係喺石澳泳灘練水兩次，完成賽事，證明寶刀未老。
鄭志剛唔玩齋打氣
健兒之中，本來有新世界發展執董鄭志剛（Adrian），可惜工作太忙，無暇練水，最終打消念頭。不過Adrian全程喺岸邊做啦啦隊打氣，仲頒獎畀得獎泳手添。Adrian話，平日得閒就游水半粒鐘，難怪身形咁Fit。