政情：煲呔曾淪過街老鼠
秋風送爽，星期日出街行下逛下，的確好寫意。不過施政劣績斑斑嘅煲呔曾最好都係咪周圍去喇，就算唔係人哋特登去狙擊佢，只係路過遇到街坊，街坊可能都會畀說話佢聽，到時佢想搵窿捐都幾難。就好似尋日咁，佢着住件街坊裝落街都畀選民力量嚴達明認到，真係冤家路窄。身為牙醫嘅達明其實都冇心搞事，但煲呔曾就騰晒雞，仲要匿入舖頭扮睇茶具，連面對市民嘅勇氣都冇。
尋日朝早，區議會選舉中出選中西區上環區嘅選民力量嚴達明同人稱「肥橙」嘅東華區候選人李肇昌落區派傳單拉票，點知行到皇后大道西樓梯街附近嘅茶舖時，見到煲呔曾同佢太太曾鮑笑薇行街，隔籬仲有個保鏢。
達明話煲呔曾尋日可能係望完彌撒想周圍行下，着得好求其，一件圓領Ｔ恤加條卡其色鬆身褲，達明形容話佢「平民到你唔信」。因為周圍有達明嘅宣傳直幡，所以煲呔曾應該知道達明係邊個，同埋知達明會認得佢，所以佢想扮睇唔到達明，行咗入茶舖。肥橙原本想行近煲呔曾，都畀佢嘅保鏢伸手示意唔畀行過去，一副生人勿近咁款。
達明諗起煲呔曾早幾日暗指人民力量立法會議員黃毓民嘅表現有如「黑社會」，就大聲同佢講︰「人民力量冇人係黑社會。」做牙醫嘅達明仲話︰「曾生，我係醫生，唔係爛仔。」煲呔曾聽到後𠵱𠵱哦哦鬼食泥咁，最後都係咩都冇講，笑笑口尷尷尬尬咁行咗去。
達明見煲呔曾就咁走咗去，連面對市民都唔夠膽，都忍唔住揶揄佢一句。煲呔曾之前喺發表施政報告時將「尾大不掉」嘅「掉」字讀錯咗，達明就話︰「記住係尾大不掉，唔好再記錯！」
冇「吉士」阻老婆出頭
呢個時候曾太擰轉頭，好似想還擊，不過就畀煲呔曾拉住。煲呔曾仲冇「吉士」過佢老婆。不過又難怪嘅，煲呔曾亂港七年，民望插水，所以心虛都唔定。
達明將遇到煲呔曾嘅事貼上社交網站，隨即引起唔少網民留言，話煲呔曾已經冇晒台型，有窿佢實會捐埋落去，點會走入群眾、面向市民咁話喎。
同嚴達明同區參選區議會嘅有甘乃威、陳賢豪，而同李肇昌同區嘅就有蕭嘉怡同何俊麒。