中環出更：孫公晚晚洗肚喪食補數
教育局局長孫明揚因為糖尿病晚晚洗肚，好多人都擔心佢嘅健康狀況。不過卓妮尋日喺馬場餐廳遇到孫公，見佢一口氣掃咗六隻生蠔、半邊龍蝦加埋碗湯添，胃口不知幾好。
孫公話，胃口好同健康係冇關嘅，佢依家晚晚都要喺屋企洗肚，所以反而要食多啲嘢，畀身體吸收多啲營養，醫生都話咁樣冇問題喎。計卓妮話，肯放開懷抱食嘢，病情都好咗一半喇。
工作壓力大 退休要抖吓
卓妮問孫公近排忙唔忙，佢話工作壓力都幾大，不過做完今屆政府、即係喺八個半月之後都退休喇，到時就可以抖吓，得閒喺屋企瞓吓覺，睇吓書，活到老學到老咁話喎。卓妮又問佢退休之後，會唔會考慮做其他社會公職，佢就笑笑口咁答話，「都要有人搵我做先得架！」