中環出更：金刀梁愛妻DIY帽出色
尋日係沙田馬場一年一度嘅莎莎婦女銀袋日，女士們都各出奇謀，戴上靚帽配合大會主題。要靚唔一定要豪裝嘅，好似行政會議成員金刀梁梁智鴻太太馮令儀就喺深水埗南昌街搜羅材料，DIY自製靚帽，恒隆董事總經理陳南祿見到都忍唔住要畀個Like佢。
雷禮權伉儷扮紅番獲獎
全國政協委員蔣麗芸以一身粉紅佳人打扮同老公梁海明嚟湊熱鬧，佢仲特登拎住個手提箱畀卓妮睇，叫大家支持本地創作。原來個箱係用雪茄盒改造而成，幾百蚊就有交易，環保又經濟，同佢個Look襯到絕。
舊年喺活動中勇奪「最合襯衣着大獎」嘅九巴後人雷禮權（William）同太太利蘊珍一向衣着出位，今年就憑住印第安造型再度獲獎。卓妮仲以為佢哋頂帽喺邊度訂造，原來係親身去南美洲嘅土著部落用幾百蚊美元買嘅，William話覺得自己嘅形象好襯民族裝扮喎。雷太話，佢哋不嬲都好鍾意研究世界各地嘅文化，早幾日先去咗歐遊七日，坐住隻船由希臘一直遊到土耳其，沿路睇吓藝術館同名勝咁，仲買咗尋日戴嗰對耳環添。
莎莎老闆郭少明同太太郭羅桂珍當然盛裝出席，雙雙以銀白色禮服造型示人，郭太仲戴住喺法國買嘅鑽石珍珠頸鏈及耳環，貴氣逼人。郭生大女郭詩慧（Melody）同老公陳振邦就整咗個八十年代懷舊造型，陳生身上個煲呔由羽毛造成，好別致，原來係Melody幫老公物色嘅。
玩具大王蔡志明太太蔡李惠莉以全身紫色亮相，不過就唔見佢老公同囝囝蔡加讚，蔡太話，原來佢哋全部都出晒國公幹，所以得自己一個，不過蔡太唔寂寞，同一班好朋友攬頭攬頸，傾得好開心。
卓妮