政情：立會耆英賴死唔走
香港政圈經常被人話一潭死水冇新面孔，歸根究柢都係班立法會耆英搵唔同理由賴死唔走。之前我哋講過協成行董事總經理方文雄大熱跑出，取代形象麻麻嘅「ＩＱ博士」黃宜弘出任中總議席，但據聞黃宜弘企硬唔認輸，最近以明年政府換屆要「維穩」為由密謀翻盤，未知能否得逞。其實班立會耆英與其嘥心機度橋苟延殘喘，倒不如退位讓畀啲後生開創一番新氣象好過啦！
雖然距離明年立法會選舉仲有大約一年，但部分功能界別議席一早已經爭到頭崩額裂。就以中總議席為例，中總內部一直有聲音希望換走盤據議席十多年、現年七十幾歲嘅黃宜弘，原本屬意由「新金王」黃英豪接班，但自早前爆出廉署請飲咖啡事件後，中總已經靜靜咁搵咗方文雄做「替補」，都唔願意翻叮黃宜弘。
本來中總呢個如意算盤都十拿九穩，但據聞黃宜弘為咗敗部復活，人前人後都同人講自己好有活力，早前又埋堆加入由多個親商政團組成嘅工商專業聯盟。最近中總內部更流傳明年政府換屆，應該要搵啲有經驗嘅議員壓場，加上黃宜弘過去喺帳委會工作亦有目共睹，明眼人一睇就係想營造佢留低嘅氣氛，據聞都有一定成數可以成事。
啱做「廣東計劃」代言人
除咗黃宜弘想再玩一屆，多名夠晒年齡攞生果金嘅功能界別議員，好似鄉議局主席劉皇發、工程界何鍾泰都想再坐一會；而啱啱夠六十五歲嘅霍震霆，多年來未有對手亦順理成章想繼續玩落去；外號「三點不露」嘅李國寶亦傳密謀「轉位」畀自己個仔，但基於業界有意見或會想再爭做一屆。至於未夠資格攞生果金嘅進出口界黃定光，最近亦動作多多為留低鋪路。
不過，講笑咁講，煲呔曾最後一份施政報告有項政策真係啱晒呢班立法會耆英，就係方便移居廣東長者攞生果金而設嘅「廣東計劃」，佢哋除咗合資格申請外，仲可以考慮成為計劃嘅代言人，一方面可以喺另一個層面服務社會，又可令立法會有一班新面孔加入，真係何樂而不為呢？