中環出更：劈炮陳碧鏵即將過檔恒隆？
因出售客戶資料圖利而黯然下台嘅八達通前行政總裁陳碧鏵，今年初先至轉戰無綫電視國際業務總經理，但日前突然傳出佢決定喺月底劈炮。報道出街後，有熱心人士即刻向卓妮報料，話陳碧鏵已經搵到新工，下月起將過檔恒隆地產，效忠天不怕、地不怕嘅恒隆主席陳啟宗。實情如何，大家拭目以待。
同何孝昌係落難戰友
為求真相，卓妮第一時間搵恒隆集團傳訊助理董事關則輝求證。不過，佢既唔承認又唔否認，大賣關子，叫卓妮問番陳碧鏵，唔應該問佢喎！熟悉恒隆內部運作嘅老友就話，陳碧鏵過檔唔係冇可能，事關恒隆董事局內有自己友，就係四年前因出售八達通客戶資料醜聞事件，同陳碧鏵一齊到立法會解畫嘅前八達通財務總監何孝昌。
何孝昌喺○八年加盟恒隆，出任財務及行政助理董事，去年九月更加升任執行董事，可見佢得到陳啟宗賞識。四年前，何孝昌同陳碧鏵曾經一齊面對八達通風暴，仲孖住去立法會接受議員嚴刑拷問，可以話係落難戰友，兩人惺惺相惜一啲都唔出奇。其實陳碧鏵咁叻賣嘢，陳啟宗借佢長處嚟賣樓，或拉攏名店租用恒隆商場，實掂晒啦！