中環出更：甄韋喬落區送暖 幫長者剪髮
白手興家成為「清潔王子」嘅菁英會秘書長甄韋喬（Mickey），社會服務愈做愈起勁，自從七月成立咗「願景兒童發展基金」（VQ）後，不斷招募義工，又計劃喺明年初落深水埗搞個大型義剪活動，免費幫二千位長者剪頭髮。Mickey前日就同一班義工去咗中環「好運泰國菜館」開餐，大家邊食邊分享義工經驗。
點解咁多嘢唔揀，偏偏要揀幫長者剪髮呢？Mickey話，剪髮最重要嘅元素係髮型師，原來VQ入面好多會員都係髮型師，可以利用剪髮嘅時間同長者溝通，長者剪完髮都特別開懷。當日Mickey同班義工傾得好投契，餐廳老闆Frankie就介紹咗味泰式生蝦同招牌菜「泰式豬頸肉」，豬頸肉即叫即燒，外脆內軟，肉汁豐富。
與囝囝朋友式相處
席間講開，原來Mickey嘅二十歲大仔已經係VQ會員，十歲嘅細仔就未夠秤入會，但細仔五歲已經跟爸爸企喺街頭做義工。Mickey三個囝囝都咁乖，咪以為佢教仔一定好嚴格，原來佢其中兩個仔都係讀寄宿學校，自由度好大。佢話依家嘅小朋友唔可以一味靠管，應該尊重佢哋，要好似做朋友咁多啲溝通。
話時話，有乜嘢誘因令Mickey躋身義工行列？佢憶述自己搵到錢後，曾經有段時期迷失於名利之間，但填補唔到心靈上嘅空白。直至一次偶然機會做義工，令佢覺得好滿足好快樂，於是一做就無停。
連Mickey身邊嘅義工朋友都話佢自從做咗義工之後，對人體貼、親切咗，笑容都多咗添！
卓妮