坊間傳說，斬手指可以戒賭。既然係咁，食環署人員會唔會有好多賭仔？賭仔想戒賭又唔敢真係將自己隻手指斬落嚟，所以諗出一條妙計「甩手指」？
嗱嗱嗱，功夫茶可能講得有少少天馬行空，不過「甩手指」真有其事。有一隻俗稱手指嘅電腦ＵＳＢ記憶體遺留旺角街頭，市民拾獲後發現內含超過五百份機密檔案資料，除咗披露食物環境衞生署小販管理隊內部行動策略及檢控資料之外，更加洩露市民私隱，包括姓名、地址以及身份證號碼等等。連販管隊人員亦身受其害，各人嘅手提電話號碼同工作表現評核報告等等，好似剝光豬咁任睇唔嬲。
簡單咁講，食環署販管隊有人洩露機密，簡直害己害人害街坊。
咦，今次係官場中人第幾次洩露機密呢？即使功夫茶記憶力再好，都冇辦法如數家珍一一詳列，事關真係多到數都數唔晒。警務處又試過，康文署又試過，醫管局又試過，總之機密一旦落入笨官之手，無可避免就係一洩如注。
今次食環署洩露嘅販管隊日常巡查報告共有三百幾份，詳列特遣隊各區日常巡查地點及時間，幾時巡查邊一條街都一目了然。假如你係無牌小販，咁啱畀你地上執到寶，咁就過癮嘞，可以根據手指提供嘅資料，按圖索驥逃避販管隊嘅法網，盡情享受非法擺賣嘅樂趣。
遺失嘅手指之內，仲有多張身穿販管隊制服男子嘅玉照。據了解，相中人懷疑就係洩漏資料嘅小販管理主任，可能因為正值員工評核期間，有人私自利用手指下載特遣隊近五百份限制級資料及文件，諗住攞返屋企做功課，點知傻傻更更跌落街。當然啦，亦有機會係仇家陷害，事關類似事件都發生過o架嘞，官場狗咬狗骨時有所聞。
洩露機密仲有一個害處，就係將食環署人員嘅愚笨嘴臉公諸於世。有一宗個案提及通州街有人駕車之時亂拋紙巾出馬路，檢控人員居然喺告票上面將事發時間由下午寫錯為「上午」。
所以話啫，私隱係唔可以隨便外洩o架，尤其係關乎官威。你知啦，特區政府弱勢管治咁多年，威信早就已經岌岌可危，如果再因為洩露私隱而醜態百出，畀全世界知道官僚辦事係幾咁甩皮甩骨，點樣捱得過明年六月冚旗收工呀？
總而言之，賭仔不妨斬手指戒賭，公務員就千祈唔好再「甩手指」。試想想，如果食環署洩露嘅機密係「垃圾論主人唐英年亂拋垃圾」，殺傷力隨時大過婚外情！