公民黨協助外傭爭取居港權，遭社會各界鬧爆，有超過二千名市民響應愛護香港力量（力量）發起聲討公民黨嘅遊行，力量嘅聲勢變得一時無兩。不過，正所謂「樹大招風」，多名有份參與遊行者亦隨即被起底，發現至少兩名有份向公民黨遞交請願信嘅人為區議會候選人，但有力量中人辯稱，唔知佢哋兩個係乜水，真係信不信由你喇。
本報尋日踢爆，有部分參與遊行嘅人為九龍社團聯會成員，亦有參加今屆區議會選舉，好似當日向公民黨遞交請願信嘅左匯雄，其實係九龍城愛俊選區候選人，同公民黨陳友昌及獨立陳燕玲對撼；另有人踢爆已報名參選九龍城愛民選區同民主黨陳麗君對壘嘅民建聯吳奮金，亦有份遞交請願物品。
愛護香港力量召集人王先生解釋，當時有十個核心成員上去公民黨總部，「唔知後面為何走多兩個人出來，亦都唔覺得佢哋代表我哋遞信」；至於左、吳二人應否就此計番選舉經費，王先生就不願置評喇。