行政署尋日發出簡單嘅幾十字通知，話明十六日（下周日）起位於中環下亞厘畢道嘅政府總部就唔再接受市民舉行活動，即係鐵閘不再為示威團體而開，示威團體要去嘅話，就要搬去添馬艦新政府總部喇。呢份通告趕在今日煲呔曾發表報告前發出，生效期又趕在報告面世後首個周日，好難令人唔懷疑煲呔曾擔心施政報告會激起民怨，所以驚定先，急急推出呢個措施將示威噪音趕去海邊！
好多人都知，新政府總部位處金鐘海邊，遊行路線又迂迴，過去幾次團體請願一般都係由金鐘經警察總部行去，同以前由遮打花園步入舊總部相比，示威聲音不但唔可以清晰傳到去禮賓府，而且路人又少好多，影響力真係差好遠。我哋向行政署查詢往年十月有幾多市民活動嘅數字，佢哋竟然話尋日無法提供，其實香港都畀人叫示威之都喇，為政者咪以為出條屎橋就可以避難至得o架。