政情：太子爺落區捱鬧深感受
自由黨今屆派出唔少年輕黨員參加區議會選舉，當中有好多屋企都具備商界背景，經濟能力有番咁上下。好似今年剛好三十歲嘅陳建業（阿業），屋企做酒樓生意，佢嚟緊會喺深水埗龍坪及上白田選區參選。入黨已有兩年幾嘅阿業坦言，落區前完全冇諗過向街坊派嘢都會畀人鬧，令佢大開眼界。
大學時修讀工商管理嘅阿業，起初真係冇諗過會落區服務市民，落手落腳做地區工作時，先至知道自己乜都唔識，試過派贈品時因為重複派畀同一個街坊，其他人就覺得唔公平，因而破口大罵，令佢感受好深。
雖然派嘢畀人鬧，但阿業一啲都冇灰心，更加無嬲咗個街坊，因為諗深一層，街坊之所以咁緊張，全因生活環境唔好，歸根究柢又係政府施政唔掂囉，呢件事反而激發起佢嘅鬥志，幫人會更加落力。除咗陳建業外，龍坪及上白田選區其餘兩位候選人分別係民協吳美及人民力量張本釗。