政情：新立會啟用 吳文華鬆晒

添馬艦立法會新大樓今日正式啟用，雖然目前仲有好多小問題要改善，但對於近十年來背負新大樓工程嘅立法會秘書長吳文華（Pauline）而言，真係有如釋重負嘅感覺。
吳文華眼見立法會新大樓啟用，有如釋重負嘅感覺。（呂浩然攝）
吳文華眼見立法會新大樓啟用，有如釋重負嘅感覺。（呂浩然攝）

尋日Pauline繼續為新大樓打點，佢喺會議廳前廳門口同職員討論植物嘅擺位，原來佢希望新大樓有啲生氣，所以訂咗十盆蕉葉放喺唔同地方，點知啲蕉葉生得太高，唔啱佢心水，所以要再諗諗計。睇完植物，Pauline又要處理會議廳外，歷任立法會主席嘅大相掛得四唔四正。

仲有地方要執漏

Pauline坦言，近十年來，佢日日孭住新大樓呢項工作，搞咗咁耐終於來到落成啟用之日，真係成個人輕鬆晒。不過，Pauline話仲有唔少地方要執漏，例如點樣方便市民去新大樓、新大樓地板唔夠平坦，容易絆倒人嘅問題，統統都想盡快搞掂。話時話，尋日我哋巡過新大樓，發現廁所指示不清，尤其係升降機同廁所嘅標誌十分相似，相信呢啲小問題仲要困擾Pauline一段時間。

兩任立法會主席嘅大相等候掛到牆上。（黃仲民攝）
  • 兩任立法會主席嘅大相等候掛到牆上。（黃仲民攝）
升降機指示牌（左）同洗手間指示牌（右）非常相似。（翁志偉攝）
  • 升降機指示牌（左）同洗手間指示牌（右）非常相似。（翁志偉攝）

Money18免費即秒股票報價網站現推出8升級功能，財經資訊，實時實發！