政情：特首辦粉飾空心報告
煲呔曾今日發表任內最後一份施政報告，好多政黨、基層團體甚至傳媒連日來同佢埋單計數，幫佢過去嘅競選承諾及七年施政進行大清算，發現幾乎全部都係得個講字，劣評如潮，民望更屢創新低。特首辦為挽救煲呔曾民望，竟然諗咗條屎橋，下令部分局長接受個別受「欽點」嘅傳媒做訪問，大數政府功績，企圖營造政府多年來做咗好多工作、好多政策得到落實嘅假象。
「欽點」傳媒 閉門造車
特首辦今次打破過往高官喺施政報告前夕封口嘅傳統，改為安排官員接受指定傳媒專訪，自吹自擂大數歷年來煲呔曾管治下各範疇落實嘅成效，以發放正面訊息，而新聞處就協助制訂「欽點」獲專訪嘅傳媒名單，包括幾間電子傳媒同指定嘅兩份少有批評政府政策嘅報章。諗出呢條屎橋，莫非係上任約得一星期嘅特首辦主任梁卓偉最新傑作？
打頭陣自吹自擂嘅係煲呔曾，佢接受電台專訪時承認房屋施政上有失誤，又話會打破框架推出房屋新政策等等，一改過往高高在上嘅傳統。最破天荒就係，做咗局長之後嘅勞工及福利局局長張建宗極少接受傳媒專訪，自佢上任以來，唔少傳媒都有要求訪問佢，可惜從來無安排過，但早兩日竟然接受一間收費電視台專訪，大談扶貧工作成效，仲要分兩日播出。
被安排接受「欽點」傳媒專訪嘅仲有運輸及房屋局局長鄭汝樺，講施政報告落實十大基建成效；新任商務及經濟發展局局長蘇錦樑就講發展六大產業嘅情況；教育局副局長陳維安就講強化香港教育樞紐嘅進展。至於「受訪者」之中官階最細嘅就係社會福利署署長聶德權，淨係講吓食物銀行推行成點，會點樣檢討等等，總之全部都係報喜不報憂。
睇番呢幾個所謂「專訪」，除咗煲呔曾承認施政有失誤比較有爆炸性外，其餘都係表揚夕陽政府嘅所謂功績，但呢啲功績嘅認受性有幾大，市民大眾有目共睹，所以呢啲「專訪」屎橋成事不足，敗事有餘。