中環出更：黃家和鍾情布根地紅酒
餐飲聯業協會會長黃家和（Simon），雖然從事咖啡奶茶食品生意做到出晒名，但原來佢對紅酒都一樣情有獨鍾，每年都會特登飛去法國多個釀酒區搜羅靚酒，當中最愛布根地（Burgundy）嘅酒莊Chembertin Grand Cru紅酒。
天時地利 香氣獨特
識飲識食嘅Simon日前又同一班會友喺中環一間食肆撐枱腳，包括協會義務法律顧問何綺蓮（Elaine）、做會董嘅海天堂創辦人吳耀明囡囡吳苑清及會員徐浩然。Simon就喺席間大談法國布根地紅酒，佢話當地氣候、土壤都非常之適合釀酒，而佳釀亦有種好獨特嘅香氣。
由於當地紅酒產量好少，Simon每年都會過去揀番啲心水貨，依家佢屋企都收藏咗唔少靚酒，有時同朋友食飯都會開支品嘗。近排盛傳Simon有意參選明年立法會飲食界議席，今次佢就講得比較實啲，話都會考慮，又話從政最緊要擺個心出嚟，如果只係為咗啲選票而做嘢，咁就冇意思喎。
卓妮