中環出更：光華新揸Fit人潮Look開騷
上星期履新嘅光華新聞文化中心主任張曼娟，尋日首次公開露面，新官上任嘅頭炮活動就係節目豐富嘅「台灣月」。佢一身輕便裝束上陣，腳踩閃令令嘅潮爆波鞋，形象與官員應有嘅行政裝扮大異其趣，原來係襯番活動主題，才女作家搞騷果然係唔同啲。
張曼娟係享譽中港台嘅知名作家，至今已擁有《海水正藍》等四十幾本暢銷著作。佢話由作家變身為官方機構揸Fit人，預咗要回應敏感嘅政治問題，就算明年台灣大選改朝換代，令佢官位不保都冇所謂，事關佢不戀棧權位，做其他嘢都一樣咁開心。卓妮見佢口齒伶俐，應對自如，未來工作實難唔倒佢啦！
送台果醬作見面禮
「Formosa」係寶島台灣代名詞，今屆台灣月活動主題曲「Run Formosa」，入面有句歌詞「穿上你的球鞋」，所以尋日唔只主人家張曼娟着波鞋，同場嘅台北經濟文化辦事處處長楊家駿、贊助商亞洲聯合財務中國區副總經理長原京毅等人，都穿上波鞋助陣，氣氛活潑唔少。
張曼娟心思好細膩，佢特登訂做一批台灣人氣「野餐趣」手作果醬，作為抵港履新嘅見面禮，社交圈唔少人都收到佢嘅貼心禮物，氹得大家甜到入心。佢又形容，兩岸及台港關係，現階段係有史以來最好嘅，希望透過新職位加強台港嘅聯繫喎！
卓妮