俗語有云，一百歲唔死都有新聞聽，碰啱今年係辛亥革命一百歲生日，最大新聞莫過於「江澤民復活」！嗱，唔好怪功夫茶搞爛Gag，畢竟亞視曾經全球獨家報道過江總死訊，而佢老人家尋日親自現身北京人民大會堂，出席辛亥革命百周年活動，幻海奇情復活論都唔算太過火啫。
香港有一位老人家同樣係一百歲生日，正日係十月九日，同十月十日辛亥革命只係相差一日咋。邊一個咁福如東海、壽比南山呢？咪就係廣華醫院囉。不過可惜吖，百年老店已經暮氣沉沉，石屎剝落、地板呈龜、牆身滲水乜都有，未必有心情開生日派對切蛋糕。
眼見廣華醫院飽歷滄桑爛溶溶，幾年前創院機構東華三院已經爭取重建。重建計劃嘅工程規限聲明亦於○八年七月得到食物及衞生局批准，○九年更加同醫院管理局簽訂合作備忘錄。重建工程原定今年施工，預計二○一七年完工。跟住你估發生乜嘢事吖嗱？特區政府居然硬係唔肯撥款，重建時間表仍然遙遙無期。呢家嘢搞到好多人心急如焚，最近有三千名市民為醫院步行籌款，敦促政府盡快投放資源重建。
至於肩負龍頭教學任務嘅瑪麗醫院，情況不遑多讓。香港大學感染及傳染病中心總監何栢良批評，教學醫院設施應該係醫學科技嘅先驅，但瑪麗遲遲無法重建，缺乏地方引入新儀器，令不少「古董」用咗二十幾年都冇更新，同第三世界國家冇乜分別。何總監好啜核咁形容，iPhone 5都就快出啦，佢哋仲用緊水壺電話。
瑪麗醫院設施落後仲產生另一問題，醫生喺公立醫院無法接觸新科技吖嘛，資深醫生由於唔想「自廢武功」而轉投私家醫院，影響公立醫院服務質素。
唉，一間廣華醫院風燭殘年，一間瑪麗醫院日薄西山，因乜事幹食衞局局長周一嶽仲係渾渾噩噩嘅呢？點解唔諗辦法重建嘅呢？功夫茶記得，油尖旺區議會副主席梁偉權講過，如果周一嶽對於廣華醫院重建問題冇一個明確交代，不排除發起示威遊行。若然出現病人紮住紗布、坐住輪椅、吊住鹽水上街示威重演辛亥革命，你都咪話唔悲壯！
好心撞板多過食飯嘅周局長，為香港小市民略盡少少綿力啦，戇Ｊ做特務就話無傷大雅得啖笑啫，戇周做局長隨時害死好多無辜病人㗎！
除咗重建殘舊醫院之外，周一嶽更加有必要改革千瘡百孔嘅醫療體制，避免屢見不鮮嘅醫療失誤。總之，醫院革命尚未成功，戇周局長仍須努力！