政情：龔耀輝教唐唐要坦白
唐唐承認有婚外情後，繼續側側膊唔講同邊位女士有感情「缺失」，又唔交代有無私生子。試過同女主播林燕玲傳緋聞嘅會計師龔耀輝（Ronald），尋日被問點睇唐唐處理危機時，龔耀輝好大方咁點評唐唐手法，話佢咁做只會產生更大餘波，公眾一定唔會收貨，最好坦白啲講晒出嚟。
Ronald話唐唐被爆有婚外情後，即刻拖埋老婆出嚟「撲火」，但唐唐講得唔清唔楚，留低尾巴畀人估估吓，只會繼續有餘波，而且唐唐身為公眾人物，最緊要係坦白，呢鋪無得唔認錯。所以佢估計唐唐要做更多公關工夫，先可以補救到民望，現時嚟睇好難令公眾收貨喎。
○八年循會計界參加立法會選舉嘅Ronald，以過來人身份剖析唐唐婚外情危機，認真有說服力。近排再次活躍會計界嘅佢，同盧華基、鄭中正等一班會計師成立咗個「一人一票選會長」嘅組織，佢哋嘅要求好簡單，就係一人一票選會長。