政情：伍士銓幫墨國搵妖怪
向來計仔多多嘅本港發明家兼牙醫伍士銓，早兩個月先話要破解埃及妖后古墓嘅秘密，估唔到咁快又接到新嘅探秘工作，就係去墨西哥羽蛇金字塔搵個密室。伍醫生話今次係墨西哥古文明國立研究院嘅考古學家塞爾吉奧‧戈麥斯博士主動邀請佢幫手，佢會畀啲改良探險機械人設計嘅意見，但唔會花太多時間，因為主力要放喺埃及嗰邊。
伍醫生幾個星期前飛咗過去墨西哥，先睇一睇羽蛇金字塔嘅周圍環境，同埋個探秘機械人有咩可以改良。佢話雷達測量到金字塔下面有條隧道，足足離地面十三米、長一百二十米，金字塔入口又大又舊，成日形住會有妖怪住喺入面，真係幾得人驚。
雖然伍醫生熱愛研究金字塔，但唔可能每個古墓都去，佢話埃及妖后個墓嘅研究工作好大型，所以要放好多心機、時間落去，就算近排埃及國內比較亂，但幾個星期後佢仍然會去當地參與探秘工作，墨西哥嗰邊就只會畀吓意見，唔會成日去。