政情：煲呔曾洗底愈洗愈糟
煲呔曾最後一份施政報告後日出台，呢個備受萬民唾棄嘅夕陽政府領導人近排動作多多，首先向親政府傳媒放風，話自己一定會喺呢份施政報告交代復建居屋嘅訴求，其後一向剛愎自用嘅佢又鬼鬼祟祟接受電台錄音訪問，酌量認衰希望得到港人憐憫，最新力作就係透過facebook群組發表一篇虛情假意嘅文章，講到底其實咪又係唔想自己遺臭萬年，喺歷史上留下不光彩紀錄囉。
不過咁，香港人眼睛係雪亮嘅，即使煲呔曾挖空心思想喺最後九個月改善民望，不過由於手法實在太拙劣，加上同佢過往囂張跋扈嘅處事手法相距太遠，所以畀佢呃到嘅始終係少數。好似佢篇文章咁，上載互聯網唔夠幾個小時，已經吸引大批網民留言，當中的確有啲好心人勉為其難講咗幾句鼓勵說話，只不過大部分留言仍舊係唔客氣咁直斥其非，網頁上怨氣爆燈。
煲呔曾妄想力挽狂瀾，可惜佢最大毛病係鼠目寸光，兼夾做人唔老實，佢喺最新一篇文章裏面，對香港嘅深層次矛盾只係輕輕帶過，反而集中吹噓香港經濟喺佢領導下有好大成果同進步，話自二○○七年起，香港經濟總量實質擴張咗百分之廿一，人均GDP亦增加咗百分之廿二喎。嘩，市民生活水深火熱之中，全香港都感受到，反而偏偏係煲呔曾乜都睇唔到咁囉。
網民睇到眼火爆，Elvis Ip一語戳破：「唔係閣下一直唔肯起居屋，香港人唔使搞到今時今日連個竇都冇囉！」黃允幟就直言：「相信普羅大眾都想到以下三隻字：我辭職。」Danny Chin就好悲觀咁話：「早走早着！不過下一任可能更衰！」Michael Chow亦批評：「死剩把口……」最一語中的相信係Gordon Choi嘅留言：「你唔好下世先做？」真係切中要點。
漫畫嘲諷40分民望
煲呔曾自取其辱，網上最新流傳兩幅漫畫，內容都係圍繞煲呔曾得四十幾分民望仍沾沾自喜有關。一幅就由著名畫家Cuson創作，畫中嘅小朋友測驗得四十分，但仍夠膽講已經算唔錯，因為連煲呔曾都係咁講喎，激到佢爸爸死死吓。另一張仲好笑，話煲呔曾嗰四十分民望分別來自「無恥」、「黑面」、「擦鞋」同「當奴」各十分，一切盡在不言中。