中環出更：陳南祿撐香港暫避表態
唐英年疑似挑戰梁振英選特首，選情愈來愈危危乎。恒隆集團董事長陳啟宗毫不諱言支持梁振英，不時為佢製造拉票機會。同陳啟宗並肩作戰嘅恒隆董事總經理陳南祿（Philip），到底撐邊個呢？
身為馬會大董嘅Philip尋日與太太、仔女齊入馬場，為愛駒「時時有機」做啦啦隊。問佢點睇唐梁拗手瓜，Philip賣關子話：「遲啲先講。」佢話特首選情人人關心，但現階段唔知點講。言下之意，似乎唔想太早表態，留有餘地。卓妮再「逼供」，問佢到底支持唐英年，定係梁振英。Philip答得巧妙：「我支持香港！」此話玄機係乜？大家揣摩吓嘞。
教仔女睇馬
講政治，太敏感。卓妮轉話題講馬，Philip就滔滔不絕。佢話馬場學問多，馬匹各有特色，每逢賽馬日，都會叫仔女多啲入場，由佢現場講解，趁機閒話家常，用呢種方式同仔女溝通，係最佳家庭教育喎。