過來人：諗過攬埋個女跳樓
四十五歲的Mikie，二○○一年誕下女兒後出現產後抑鬱徵狀，經常悶悶不樂，及後因與女兒相處問題令病情惡化，動輒因小事大發脾氣。她求診後卻自行停藥而令情緒病復發，試過服安眠藥自殺，幸獲救。跨過鬼門關後，她終乖乖服藥並辭去工作全職照顧女兒，現時病情趨穩定。
辭工改善關係
Mikie昨憶述女兒出生後自己情緒低落，當時認知不足未有求醫。女兒漸長，她發現女兒不愛與自己相處，「佢到兩歲都完全唔黐我，抱親佢都喊，好似我變咗巫婆咁！」她因此更感沮喪，長期受失眠、頭痛、暈眩及胃炎等困擾，亦影響工作表現，「朝早起身就攤落梳化，完全唔想返工，做錯一兩件事就好驚好驚，心跳好快。」
○三年底，她的病情惡化，「出街好似遊魂咁，去地鐵站都行錯路；食飯睇住餐牌十五分鐘，都唔知揀A、B定C餐。」她更多次因搭錯車及用膳時不滿座位等小事而大發脾氣，丟下丈夫及女兒自行離去，亦試過趕家人出街，自己獨坐窗前不斷浮現跳樓念頭，「甚至諗過攬埋個女一齊跳。」
她向精神科醫生求助，惟服抗抑鬱藥後一、兩星期便自覺好轉偷偷停藥，半年後病情復發，吞服大量安眠藥自殺。獲救後，她終按時服藥，並於○六年女兒升小學時，決定辭去秘書工作，以免顧此失彼。Mikie現時與女兒關係大大改善，更成為女兒「最喜歡的人排行榜」第一名。
本報記者