幾年前有部電影叫《頭文字Ｄ》，講述年輕人沉醉飆車，追求「飄移」極速快感。如果大家冇睇過，唔緊要，香港最近頻頻有真實版上演，一樣咁驚險刺激㗎。呢，人稱《頭文字Ｂ》，即係ＢＢ仔喺大人擺布下揸大膽車，橫衝直撞，諗起都驚。
《頭文字Ｂ》做極都有，呢嗱，尋日又有新劇情。有位五歲男童同兩個哥哥，由舅父揸客貨車接送上學，當到達目的地大人落車後，坐喺司機位旁邊嘅五歲百厭仔懷疑貪玩，觸動手掣令車輛溜後，其母親諗住上前煞車，反被車門撞倒受傷，結果客貨車溜後近兩米，撞到路邊鐵欄先至停低，過程驚險刺激，冇釀成嚴重傷亡事故，都算不幸中之大幸咯。
五歲幼童誤動手掣，同ＢＢ揸大膽車一樣，隨時可以釀成巨禍，呢啲事故提醒大家，將兒童安置喺司機位或者前座位置，係一件好危險嘅事，分分鐘搞出人命都有之。嗱，功夫茶唔係危言聳聽㗎，台灣就有一對新婚夫婦駕車外遊，太太手抱未滿月兒子坐前座，點知喺高速公路遇上車禍，男嬰頭部遭彈出嘅安全氣囊重擊，顱內出血慘死。
所以話啫，嬰兒坐車好似備受保護，其實道路安全危機四伏，稍不留神就會釀成悲劇。話時話，嗰位客貨車司機畀五歲百厭仔坐喺司機位旁邊固然係疏忽，但講嚟講去，最漠視道路安全嘅其實就係立法粗疏嘅特區政府。
港府立法點粗疏呢？大家都知，當發生車禍，前座乘客嘅傷亡率特別高，所以外國好多地方都對孩童坐車頭作出限制，例如美國加州就規定六歲以下兒童只可坐後座，內地唔少地方亦於去年立法禁止十二歲以下孩童使用副駕駛位，台灣亦規定一歲或以下嬰孩須置於後座嘅嬰兒用臥床。
之但係，港府立法仲寬鬆過唔少落後地區，對嬰孩座位完全冇監管，只係象徵式要求兩歲或以下孩童坐前座時，必須使用適當安全設備，聊勝於無。正如法律界人士指出，兩歲嬰孩體形細小如欖核，一旦發生車禍，安全帶未必能夠保命，如果好似台灣安全氣囊奪命咁仲大劑啦，大家話港府係咪靠害吖？
一句講晒，道路安全事故多，只怪監管太粗疏。歌仔都有得唱啦，馬路如虎口，當局漠視兒童同其他道路使用者嘅安全，自製法例漏洞，其實同一手炮製《頭文字Ｂ》嘅貪玩父母冇分別，一樣都係抵鬧！