疑似特首候選人唐英年行蹤好鬼祟，好似原訂喺尋日下午二時喺中環香港會同行政會議成員梁智鴻會面，但中午就突然更改地點，完全係想撇甩傳媒追訪。
為免誤中調虎離山之計，一眾傳媒都按兵不動留守香港會，豈料撞破以煲呔曾為首嘅多名港英餘孽行出嚟，直到傍晚唐唐先至突然出現香港會。
尋日下午兩點幾鐘，正當傳媒喺香港會門外等候唐唐之際，突然見到煲呔曾同前行會成員范鴻齡、前教統局局長李國章、馬會前主席陳祖澤排住隊行出來，之後冇耐「民主阿婆」陳方安生同前投資推廣署署長盧維思亦前後腳步出，成班港英餘孽不遲不早一同出現，真係令人產生好多聯想！
雖然唐唐中午無出現，但到傍晚時分就見唐唐匆匆抵達進入香港會，之後又有大批政府車輛駛至，當中包括保安局局長李少光及副局長黎棟國、教育局局長孫明揚，據講係為已退休嘅前食物及衞生局常秘李淑儀餞別，共有百多人出席，非常墟冚，唔知大家嘅話題會否係熱爆全城嘅婚外情呢？