政情：議員嫌新立會地方大
立法會內務委員會尋日喺添馬艦新大樓開會，成為首個喺新大樓召開嘅公開會議，好多議員都有去開會體驗吓新會議室。除咗仍然出現甩漏問題需要關注外，好多議員仲嫌新大樓地方太大唔方便。以前舊大樓細又話細，依家面積大咗又話太大，真係難服侍。
鄉議局主席劉皇發一去到新大樓就喃喃自語話新大樓咁大，點解要嚟呢度呢？以前舊大樓咪仲舒服！跟住自由黨方剛就話，新大樓大到好唔方便。細又話細，大又話大，究竟議員想點呢？同場仲見飲食界張宇人對枱頭部電腦有疑問，要秘書處職員到場協助。
不過，新大樓仲有啲硬件仍未解決，好似工聯會王國興就發現會議室嘅枱頭下，有一塊畀議員墊腳嘅木板鬆脫，擔心好容易會跌落嚟壓親對腳，搞到佢要用文件夾頂住。咁多問題，歸根究柢都係倉卒搬屋，日夜趕工自然冇「細貨」，加上班議員要求又高，自然有所不滿喇。