網民惡搞改圖創意十足，而且長改長有，尋日網上又流傳一幅新作，就係將疑似特首候選人唐英年同政務司司長林瑞麟（林D9）個樣，嵌入電影《斷背山》海報兩位主角個樣上面，效果相當完美。創作人仲將戲名改成《斷港奸》，意指佢哋打孖上禍國殃民，戲名、意境同改圖都配合得天衣無縫。
除咗唐唐同林D9被惡搞外，就嚟執包袱嘅煲呔曾都唔好過，有人創作咗一個手機遊戲，名為「Donald Dog 我會做好一隻」，睇個名已經知道玩緊邊個。個遊戲玩法好簡單，主角係一隻狗，你可以掌摑佢、又可以餵佢食嘢，甚至餵佢食屎都得。
點解會有人設計呢個咁抵死嘅遊戲真係唔使多講，但可惜暫時只係得Android手機可以下載，用其他機種嘅人可能要等等喇。