政情：Tim霍促唐唐交代婚外情
唐唐承認有婚外情，唔同陣營、唔同背景都有唔同反應。好似同樣傳有婚外情嘅金融界立法會議員李國寶（寶Baby）就大力挺唐，話婚外情「好小事啫」；涉嫌向女助理求愛不遂嘅白鴿黨甘乃威，亦話唐唐嘅處理手法有改善空間；曾經離婚又再婚嘅白鴿黨李永達（高達）更輕輕帶過，唯獨婚姻失敗嘅霍震霆（Tim霍）發威要求唐唐向公眾交代事件。
高達甘威 唔敢猛批
唐唐婚外情醜聞，簡直係各立法會議員嘅感情觀照妖鏡，每逢議員有做過類似事件，都唔敢向唐唐開火，例如曾經離婚又再婚嘅高達，就唔敢猛批唐唐，只係話「界線要清清楚楚」，輕輕帶過就算。佢嘅黨友甘乃威同樣涉嫌求愛不遂而怒炒女助理，但佢只係笑笑口話唐唐處理手法有改善空間，出手非常之輕。
不過，高達同甘乃威都唔夠寶Baby勁，一句「好小事啫」，就將婚外情一事講到紙咁輕，仲話呢啲事對唐唐選情完全唔會有影響喎。其實當年佢被踢爆同廖創興銀行家族後人廖碧欣喺巴黎把臂同遊，都唔覺係一回事，試問唐唐嘅婚外情，佢又點會係一回事呢！
三個婚後都坐唔定嘅議員，齊齊撐唐，反而經歷過婚姻失敗嘅Tim霍忽然神勇，覺得唐唐應該清楚交代事件，仲話作為公職人物，點都要同公眾有個交代，唔可以就咁算數。Tim霍平時講嘢都唔會多過兩句，今次咁講，睇嚟有感而發，完全表露出佢內心深處。
其實對唐唐婚外情睇唔過眼嘅大有人在，好似熟悉官場運作嘅新民黨主席葉劉淑儀就爆料，話政府高官晉升時，一定要做深入品格審查，最後一條問題會問當事人有無不可告人秘密，例如欠人錢或者私生活檢唔檢點等，總之乜嘢都要坦坦白白講清楚，所以葉太同樣認為唐唐要交代清楚。
前高官「眾人媽打」李麗娟更暗批唐唐，話好欣賞唐太郭妤淺嘅做法，覺得佢大方得體，做得非常好。言下之意，即係話唐唐做法肉酸，令自己老婆受屈，幸好唐太大方忍得到。講到咁好，婦女團體係咪應該頒個「忍辱負重」獎畀唐太呢？