中環出更：二仔小登科 李運強感圓滿
理文造紙主席李運強二仔李文恩（Norman）小登科，尋晚迎娶家電太子女郭靜怡（Lorinda），李運強再做老爺開心到笑唔停，同太太送咗隻名貴手錶賀兒子。Norman係李家最後一位「鑽石男」，其餘五兄弟姊妹早已成家立室，今次抱得美人歸，李爸爸笑住口話：「感覺好圓滿！」
沙灘點蠟燭 吟詩句求婚
李家尋晚喺尖沙咀洲際酒店筵開近五十席，城中政商界名人來齊飲喜酒，大哥文俊、家姐文慧、文禎及弟弟文斌（Edmond）傾巢而出招呼賓客。三十二歲嘅Norman長駐蘇州，係理文化工揸Fit人。新娘子Lorinda來頭不少，爸爸郭燦耀係光榮電業董事總經理，曾奪九七年青年工業家獎，兩家好登對。
Norman自爆同太太好有緣，兩人早於十幾歲已在家庭聚會中認識，兩年幾前拍拖，Lorinda聰明又靚女，令男方一見傾心。
求婚過程充滿驚喜，Norman喺沙灘點滿蠟燭，又送上感人詩句，冧到極。一對新人今日起程去南非度蜜月，觀賞野生大草原，夠晒浪漫。
尋晚婚宴冠蓋雲集，工總主席鍾志平、立法會議員梁君彥、林健鋒、廠商會副會長顏吳餘英、前民政事務局常秘李麗娟及前仁濟主席董吳玲玲都賞面到賀。
身為仁濟主席嘅Edmond，同太太Amanda滿場飛招呼嘉賓。卓妮問佢哋送乜賀禮，Edmond笑騎騎話，梗係送龍鳳鈪最實際啦！
卓妮